MABILIONI YA RAIS SAMIA ILEJE KUFUNGUA FURSA ZA KIUCHUMI,KUJENGEWA BARABARA ZA KISASA TOKA UHURU

 

WANANCHI wilayani Ileje mkoani Songwe,wameiharakisha wizara ya ujenzi kupitia wakala wa barabara nchini (Tanroads) mkoani Songwe kuongeza jitihada za kuhakikisha barabara zinakamilika kabla ya msimu wa mvua kuanza ili kukwepa kutopitika kwa barabara hizo kutokana na uwepo wa tope na mashimo.

Wilaya ya Ileje ni moja ya wilaya kongwe nchini ikikabiriwa na changamoto nyingi ikiwemo ubovu wa barabara ambazo nyingi ni za vumbi zinazoharibika na kutopitika wakati wa mvua za masika hali inayopelekea kutumia njia za uchochoroni kupita kwenda kupata huduma upande wa pili ikiwemo makao makuu ya wilaya.

Kwa muda mrefu wilaya hiyo imekuwa ikikabiriwa na changamoto hiyo,na kusababisha baadhi ya watumishi miaka ya nyuma wanapopangiwa kazi Ileje wakiacha kazi wakiona kama kufanya kazi wilayani humo ni kama adhabu lakini kwa sasa kumekuwa na mabadiriko makubwa.

Wakizungumza jana kwa nyakati tofauti jana wakazi wa wilaya hiyo,walisema kwa muda mrefu wamekuwa wakitumia barabara zisizokuwa na hadhi kutokana na ukosefu wa Barbara za viwango ambapo walisema baada ya kilio cha muda mrefu kwa sasa wamepata faraja baada ya kuona ujenzi wa miradi hiyo unafanyika kwa kasi.

Anna Kayange mkazi wa Kijiji cha Kafwafwa alisema alipoona wakandarasi wanapita kufanya upembuzi yakinifu kwa ajili ya matengenezo na utanuzi wa barabara aliona kama wanaigiza kutokana na wao kutopelekewa miundombinu hiyo kwa muda mrefu na kwamba amepata faraja baada ya kuona ujenzi unafanyika.

Sala Mwashibanda mkazi wa kijiji cha Kafule alisema wakazi wa maeneo hayo hasa akina mama wamepata shida sana baada ya kutokuwepo kwa madaraja na hata barabara nzuri za kuwafikisha maeneo yenye mahitaji ikiwemo vituo vya kutolea tiba hasa kipindi cha mvua ambapo walilazimika kupata huduma za matibabu kwa waganga wa kienyeji nchi jirani ya Malawi.

Alisema kwa sasa wamefarijika baada ya kuona ujenzi wa Madaraja,Makaravati na barabara zinajengwa na kujenga imani ya kusafiri kwa uhakika kwenda kupata huduma muhimu,na kwamba anaomba wahusika wa ujenzi wa miradi hiyo wafanye kazi usiku na mchana kukamilisha miradi ili isije kuharibika na kukwama wakati mvua za masika zinaanza kunyesha.

Mkurugenzi mtendaji wa halmashauri ya wilaya ya Ileje Jofley Mnauye,kukamilika kwa miradi hiyo kutafungua fursa za kiuchumi kwa wakazi wa Ileja na maeneo jirani kwani watapita na kufika kwa haraka maeneo husika na kwamba serikali imesikia kilio cha wananchi ambapo tayari miradi hiyo muhimu inajengwa na mingine ipo hatua za umaliziaji.

Meneja wa wakala wa barabara mijini (Tanroads) mkoani Songwe,Injinia ,Suleiman Bishanga alisema ni kweli hali ya barabara Ileje ilikuwa na changamoto,lakini kwa awamu hii ya Rais Samia wamepokea fedha nyingi zitakazojenga barabara,makaravati na madaraja katika Ileje na maeneo yote mkoani Songwe na kuondoa tatizo hilo sugu.

Alisema wanatengeneza barabara ya Kalembo kwenda Katengele yenye kilometa 15 pamoja na ile ya Isongole Isoko pamoja na kuitanua ambapo Bilioni 1.2 zinatumika kwa kazi hiyo ambapo pia alisema kitongoji cha Ndembo kijiji cha Kikota madaraja yanajengwa katika barabara itakayounganishwa hadi Kasumulo Kyela.

Aliongeza kuwa barabara ya Isongole 11 kwenda Katumba itaunganishwa hadi kutokea Kasumulo Kyela itajengwa kwa kiwango cha Lami na kuwekwa makaravati na tayari upembuzi yakinifu umefanyika na suala la fedha kwa ajili ya kuanza ujenzi lipo hatua nzuri.

‘’Tupo kikazi zaidi kuhakikisha barabara zote Ileje zinapitika na ytayari daraja moja limekamilika ambapo kiasi cha Milioni 155 zimetumika ambapo msimu uliopita wa mvua Daraja hili lilileta shida na hata kubomoka wananchi walipata shida baada ya kushindwa kupitika’’alisema Bishanga.

Akimuwakilisha mkuu wa mkoa wa Songwe Waziri Kindamba,mkuu wa wilaya ya Ileje Anna Gidarya,alisema baada ya ujio wa fedha hizo walifanya ziara maeneo yote na kuona kazi zinaendelea na kwamba anaagiza wahandisi wanaosimamia miradi hiyo kuharakisha ujenzi ili ikamilike kabla ya mvua hazijaanza.

Alisema Rais Samia katoa fedha nyingi kuhakikisha Ileje inafunguka na inakuwa kiuchumi,ili kufanikisha hilo ipo haja ya wasimamizi wa Miradi hiyo kuongeza juhudi ili ikamilike kwa wakati na wananchi waondokane na kadhia hiyo ya muda mrefu.