RAIS RUTO KUANZA ZIARA TANZANIA

 

Rais wa Kenya, William Ruto kesho ataanza ziara ya siku mbili nchini, ikiwa ni ziara yake ya kwanza katika nchi ya Afrika Mashariki tangu alipoapishwa Septemba 13, kuwa Rais wa tano wa nchi hiyo.Tangu alipoapishwa, Rais Ruto ametembelea nchi tatu tofauti, ikiwamo Uingereza alikokwenda kuhudhuria maziko ya Malkia Elizabeth II, Marekani kuhudhuria mkutano mkuu wa Umoja wa Mataifa na jirani zake wa Ethiopia.

Ziara ya kiongozi huyo imekuja wakati yeye na Rais Samia Suluhu Hassan wakiahidi kuendelea kushirikiana kuleta maendeleo ya kijamii na kiuchumi kwa wananchi wao na Afrika Mashariki kwa ujumla.

Kwa kuifanya Tanzania kuwa nchi ya kwanza kutembelea katika Jumuiya ya Afrika Mashariki (EAC) yenye nchi sita, inatoa ishara kwamba uhusiano wa Tanzania na Kenya unazidi kuimarika.

Alipokutana na Rais Samia jijini Nairobi, Kenya saa chache kabla ya kuapishwa, Ruto aliandika kwenye ukurasa wake wa Twitter akisema Serikali yake itashirikiana na Tanzania katika biashara, kilimo, usalama na maeneo mengine.

“Tutapanua ushirikiano wetu na Tanzania katika biashara, kilimo, usalama miongoni mwa maeneo mengine yenye maslahi, mbali na kufanya kazi pamoja kwa nia ya kuijenga Jumuiya ya Afrika Mashariki kwa manufaa yetu sote,” aliandika Ruto.

Rais Samia naye alipopata nafasi ya kuzungumza kwenye hafla ya kuapishwa kwa Ruto, aliwapongeza Wakenya kwa kuonyesha ukomavu kwenye uchaguzi uliofanyika Agosti 9 na kuwahakikishia Tanzania itaendelea kushirikiana na Kenya kuleta maendeleo.

Pia, alisisitiza Tanzania itaendelea kushirikiana na Kenya katika kuleta maendeleo ya kijamii na kiuchumi.