HIVI NDIVYO WATANZANIA WALIVYOTAPELIWA MAMILIONI MTANDAONI
Wakati kilio kwa baadhi ya Watanzania kikiendelea kutawala kwenye mitandao ya kijamii kutokana na madai ya kutapeliwa fedha zao na kampuni ya Kalynda inayojishughulisha na biashara mtandao, Serikali imesema inafuatilia kujua ukweli.Akizungumza na Mwananchi kwa simu, Naibu Waziri wa Uwekezaji, Viwanda na Biashara, Exaud Kigahe alisema wameshaviagiza vyombo vya sheria kufuatilia suala hilo.
“Watu wanachozungumza ni sahihi, lakini ni vizuri kwenda na sheria na kanuni ambazo zitawabana. Lazima tuchunguze hawa wenye kampuni leseni yao ya biashara wanatumia kwa mlengo waliyoombea au wanafanya tofauti,” alisema Kigahe.
Kampuni hiyo yenye ofisi zake maeneo ya Posta, Dar es Salaam, imeshafunga ofisi na wahusika hawajulikani walipo.
Kamanda Muliro alisema taarifa hizo za watu kutapeliwa, nao wanazisikia na kuzisoma kwenye mitandao ya kijamii.
“Wakifika kuripoti tutaanza kufanyia kazi kwa kuanza uchunguzi, ili tuhakikishe watu hawa wanapata haki yao,” alisema Muliro.
Waathirika wafunguka
Yockbert Maliva, mmoja wa waathirika akizungumza na Mwananchi jana alisema viongozi wa kampuni hiyo walitoa mwongozo wa kushiriki upatu ambao ni wa watu kujiunga kwenye kundi la WhatsApp lililoanzishwa ambalo lina watu 381.
Alisema alijiunga na kampuni hiyo Julai, mwaka huu; “walituambia ukiweka mtaji wako utapata faida kwa maana ya kamisheni asilimia 4 ya kiasi unachowekeza na ukiongeza watu wa kujiunga, kamisheni inaongezeka kulingana na idadi ya utakaowashawishi kujiunga.” Maliva, mkazi wa Iringa, alisema aliweka mtaji wa Sh1.3 milioni.
“Tumetapeliwa, huu mfumo waliotumia kuwarubuni na ushawishi kwa Watanzania, ili wapate wateja ilikuwa ni vigumu kutambua kama ni matapeli kwa sababu walikuwa wakijitangaza hata kwenye televisheni moja kubwa hapa nchini,” alidai Maliva, ambaye alisema amewashawishi watu wengi kuingia, wakiwamo ndugu zake.Alisema Serikali haiwezi kukwepa lawama, akidai Kalyanda ilikuwa ikijitangaza kupitia vyombo vya habari na wenye mamlaka walikuwa wakiona, hivyo kama Brela waliona inafanya kazi tofauti na leseni waliyowapatia, ilipaswa iwachukulie hatua haraka. Hata hivyo, akizungumza na Mwananchi kwa simu jana, ofisa mtendaji mkuu wa Brela, Godfrey Nyaisa aliwataka Watanzania kuacha tabia ya kutaka utajiri wa haraka, badala yake wafanye kazi halali za kujiingizia kipato.
“Hii kampuni biashara zao walikuwa wanafanya kwa kificho na hatukuwahi kuona wakijitangaza, kwa hiyo ovu linalipwa kwa haki na haki ni sheria kuchukua mkondo wake.
“Juzi tu tulitoka kupigwa na QNet, tunashangaa kabla ya mwezi kuisha wanaibuka Kalynda, katika hili nasema Watanzania wafanye kazi waache njia za mkato.” Nyaisa alisema kwa kuwa kampuni ziko nyingi nchini, Brela ina utaratibu wake wa kufuatilia namna zilivyopata leseni na namna zinavyotekeleza majukumu yao, licha ya nyingine kufanya biashara zao kwa kificho.
“Mbele wanaonyesha wanafanya biashara fulani, lakini nyuma ya pazia wanauza gongo,” alisema Nyaisa.
Hata hivyo, Maliva alisema Brela wanapaswa kuonyesha ushirikiano kwa kutoa taarifa za Kalynda, ili waliofanya mchezo huo wachukuliwe hatua.
“Tunaomba pia mitandao ya simu iliyokuwa inatumika kupokea fedha za Kalynda izuiwe kwa sababu bado iko hewani,” alisema Maliva.
Mwingine, Shazima Hamis, mkazi wa Babati mkoani Manyara alisema alijiunga na Kalynda miezi miwili iliyopita na aliwekeza mtaji wa Sh1.7 milioni.
Alisema alifanikiwa kuchukua Sh50,000 na alijiunga baada ya kushawishiwa na kaka yake.
Comments