ADEM KUANDAA MODULI YA MAFUNZO YA MASAFA MAREFU

 Wakala wa Maendeleo ya Uongozi wa Elimu (Adem), unandaa moduli kwa ajili ya kutoa mafunzo ya masafa marefu, lengo likiwa ni kuwezesha viongozi wa sekta ya elimu wanaopata changamoto ya ruhusa kazini kupata mafunzo.

Hayo yamesemwa leo, Jumanne Novemba 15, 2022 na Mkurugenzi Mkuu wa Adem, Dk Siston Mgullah wakati akielezea majukumu ya wakala huu na vipaumbele vyake kwa mwaka wa fedha 2022/23.

Dk Mgullah amesema kwa sasa wanamradi na Chuo cha Mzumbe kwa ajili ya kuandaa moduli za kuendeshea mafunzo ya masafa, ambapo wameshafika mahali pazuri

“Programu tuliyonayo ni kuanza mafunzo ya masafa kwa namna tofauti, tunaweza tusiende kama Open University (Chuo Kikuu Huria) kinavyofanya ndio maana tunashirikiana pia na Aghakhan University (Chuo Kikuu cha Aghakhan) ambao wako advance (wako juu) katika suala hilo,” amesema.

Amesema lengo ni kushirikisha taasisi hizo na kutafuta raslimali zitakazowawezesha kutengeneza mifumo hiyo.

Aidha, amesema wana mkakati wa kuanzisha masomo ya jioni katika mikoa ya Mwanza, Dar es Salam na Dodoma ili kuwawezesha watu wasiokuwa na ruhusa kutoka kwa waajiri wao jambo ambalo ni tatizo.

Pia amesema wakala umetoa mafunzo ya muda mfupi kuhusu uthibiti ubora wa shule wa ndani kwa walimu 7,612 ili kuwajengea uwezo wa kusimamia ufundishaji na ujifunzaji katika shule wanazosimamia.

Kwa upande wake Msemaji Mkuu wa Serikali, Gerson Msigwa amesema Serikali inaweka fedha nyingi kwenye sekta ya elimu nchi nzima ambapo kwa mwaka wa fedha 2022/23 ambapo sekta ya elimu pekee imetengewa Sh5.8 trilioni.

“Fedha hizi ni nyingi ambazo zinahitaji usimamizi wa karibu, hivyo wale viongozi wa kwenye taasisi zinazosimamia elimu lazima wawe na ujuzi na mbinu nzuri za kusimamia maendeleo ya elimu ili tuweze kupata thamani ya fedha zilizotolewa na Serikali,” amesema.

Amesema viongozi wanaosimamia taasisi za elimu wanatakiwa wakasome katika chuo hicho ili wakapate ujuzi wakasimamie vizuri taasisi hizo.

Ametoa wito kwa waajiri kutosita kuwaruhusu viongozi wa taasisi za elimu kwenda kusoma Adem