IPUNGA BARABARA YA KILOMETA 50 KUUNGANISHA MBOZI NA MOMBA KUPITIA MSANGANO,KAMSAMBA YATAJWA KUONGEZA FURSA ZA KIUCHUMI

 

Na Rahim Secha,Mbozi

WANANCHI wa vitongoji 21 wa kata ya Ipunga wilayani Mbozi mkoani Songwe wameanza kupata manufaa ya kiuchumi baada ya wafanyabiashara ya mazao yakiwemo mahindi kutoka nchi za Zambia,Malawi na Kenya kufika na magari katika mashamba yao kununua nafaka hizo kutokana na uwepo wa barabara nzuri inayochecheo mnyororo huo.

Wakizungumza jana na gazeti hili wakazi wa eneo hilo walisema wao asilimia 80 ni wakulima wa mazao mbalimbali miaka zaidi ya kumi wanunuzi wamekuwa wakinunua mazao yao kwa bei ya kilanguzi kutokana na wafanyabiashara wakubwa kushindwa kufika kutokana na uwepo wa barabara mbovu.

Antson Simbeye mkazi wa Ipunga alisema barabara ya kutoka Mlowo kwenda Kamsamba inaumuhimu mkubwa kwani bidhaa nyingi zinazotoka wilaya ya Momba inapita katika njia hiyo kwenda makao makuu ya mkoa na hata mikoa mingine hivyo serikali imefanya kazi nzuri kuijenga licha ya kuwa bado haijawekwa lami.

Juhudi Siyame mkazi Vwawa,alisema Serikali kupitia wakala wa barabara mijini (Tanroads) wamejenga barabara hiyo wamekidhi mahitaji muhimu ya wananchi,kwani kwa sasa wameweza kukuza uchumi kwa kuuza mazao kwa bei kubwa na kuongeza fursa za wakulima kutoka maeneo mbalimbali wanaofika kwa ajili ya kulima mzao baada ya uwepo wa barabara inayopitika.

Naye Sosten Mbalwa mkazi wa Ipunga,alisema serikali imefanya kazi kubwa kujenga barabara hiyo licha ya kuwa si ya kiwango cha Lami lakini inapitika vizuri ombi lao kubwa ni kutaka iwekwe Lami na kwamba anaomba Tanroads waweke alama za barabarani na hata matuta maeneo ya taasisi zikiwemo shule kwani vyombo vya moto vinakimbia na kuhatarisha ajali.

Rozy Kayando mkazi wa Iwate,alisema barabara hiyo awali ilikuwa mbaya na kusababisha vijiji na tarafa hiyo yenye wakulima wengi kudumaa kutokana na kushindwa kusafirisha mazao na hata bei za pikipiki kutoka Vwawa kuja Ipunga ilikuwa ni zaidi ya 10,000 lakini kwa sasa wanatumia Tsh,3000.

Alisema kazi kubwa waliyonayo ni kuhakikisha wanakuwa walinzi wa barabara hiyo kwa kuwazuia wafugaji kupitisha mifugo yao hasa mikokoteni ya kukokotwa na ng’ombe ambayo kwato zao zinaharibu barabara.

Diwani wa kaya ya Ipunga Barton Siyame,alisema kwa sense ya mwaka 2012 kata hiyo ilikuwa na wakazi 12,000 huku ikiwa na vitongoji 21 vijiji 4 ikiwa kama kisiwa upende wa juu imepakana na mto Mpemba na upande wa chini mto Nkana wote wanategemea barabara hiyo ya kutoka Ipunga kwenda Msangano hadi Kamsamba wilayani Momba.

Alisema wakazi wa eneo hilo wanazalisha mazao mengi ndiyo maana baada ya ujenzi wa barabara hiyo,magari ya kutoka nchi mbalimbali ikiwemo Kenya yanafika kununua mazao na wao kupata fedha nyingi na kuiona kazi ya kilimo kuwa ni mkombozi ukilinganisha na ilivyokuwa awali.

‘’Ndugu Mwandishi Ipunga ilikuwa na changamoto za kiuchumi kutokana na ubovu wa barabara,lakini kwa awamu hii ya sita serikali imesikia kilio chao kwa kutengeneza barabara na sasa ni kinara wa uchumi kata hii imekuwa ya kwanza kimapato kwa wilaya ya Mbozi’’alisema Ipunga.

Kaimu Meneja wa wakala wa barabara mijini (Tanroads) mkoa wa Songwe,Injini Suleiman Bishanga alisema barabara hiyo kutoka Ipunga Mbozi kwenda wilaya ya Momba inazaid ya kilometa 50 ambayo imejengwa kwa kiwango cha changalawe na inapitika vizuri kipindi chete hapo baadae inatarajiwa kuwekwa Lami.