MADARASA YA GHOROFA TUNDUMA YATAJWA KUPUNGUZA MSONGAMANO NA KUONGEZA UFAURU KWA WANAFUNZI

Na Rahimu Secha,Tunduma

UPUNGUFU wa madarasa katika halmashauri ya mji Tunduma umetajwa kumalizika baada ya ujio wa madarasa yanayo jengwa kwa mtindo wa Ghorofa hali iliyotajwa kuondoa msongamano uliopelekea wanafunzi kushindwa kusoma vizuri.

Halmashauri ya mji Tunduma ipo Wilaya ya Momba ambayo ilimegwa kutoka wilaya ya Mbozi miaka ya hivi karibuni huku ikikabiriwa na changamoto nyingi ikiwemo mlundikano wa wanafunzi darasani ambapo kwa wastani darasa moja limekuwa na Zaidi ya wanafunzi 200.

Kutokana na msongamano huo,halmashauri ya mji Tunduma kupitia vikao vyao walipendekeza kuanza kujenga shule kwa mfumo wa Maghorofa ili kuendana na uhaba wa maeneo kutokana na mji huo ambao ni wa kibiashara kuingiwa na watu wengi ambao wamekuwa wakifuata fursa za kibiashara.

Zephania Mgola mkuu wa shule ya sekondari Uwanjani,alisema ili kukabiliana na changhamoto hiyo mwezi Disemba 28 2021 walipokea Tsh,470,000,000  kutoka serikali kuu kupitia Program ya SEQUIP kwa ajili ya ujenzi wa shule mpya ya sekondari katika kata ya Uwanjani.

Alisema ujenzi huo ulianza Mwezi Machi 18 mwaka 2022,ukihusisha ujenzi wa vyumba 10 vya madarasa katika jengo la Ghorofa,vyumba vitatu vya maabara za sayansi,jengo la utawala Pamoja na jengo la ICU na Maktaba.

Aliongeza kuwa mpaka sasa mradi umepokea Tshs,768,709,612 na kutumia Ths,662,305,847,000 ambapo matumizi ya fedha hizo yamehusishwa manunuzi ya vifaa mbalimbali vya ujenzi Pamoja na malipo ya mafundi katika hatua mbalimbali za kazi walizozifanya.

Aliitaja changamoto iliyopo kuwa ni kupasuka kwa Granolithic floor katika jengo la utawala Pamoja na jengo la Tehama na kwamba kufuatia changamoto hiyo,mhandisi wa ujenzi anaendelea kufanya tathimini ya gharama za marumaru na ufundi zitakazoongezeka.

Kigola alisema wana kila sababu ya kumpongeza Rais wa Jamhuri ya Muungano wa Tanzania Samia Suruhu,kwa kukubali kuwapatia fedha kwa ajili ya ujenzi wa mradi huo katika halmashauri yam ji Tunduma.

Kwa upande wake katibu tawala mkoani humo,Happines Seneda alisema ni jambo la busara kupongeza kazi ya Rais Samia kwa kutoa fedha hizo na kwamba kazi iliyopo ni kuhakikisha wanaongeza juhudi za ufundishaji ili wanafunzi waweze kupata alama A na B.

Alisema katika kuhakikisha mazingira yanatunzwa katika kila kaya za mjini wahakikishe wanapanda miche ya miti 5  na kaya za vijijini miche 10 na kwamba ili wanafunzi wafanye vizuri darasani wanatakiwa kupata chakula hivyo jitihada za kuhakikisha vyakula vinatolewa mashuleni jitihada zifanyike.