WATELEKEZA LORI NA PIKIPIKI SITA ZILIZOBEBA BANGI

 

POLISI mkoani Morogoro inamsaka dereva wa lori aina ya Mitsubishi Fuso lenye namba za usajili T.301 DPQ  lenye tela namba T. 562 DNV  mali ya  Kampuni ya K.T. Abri  alilolitelekeza.

Ndani yake imekutwa mifuko 30 ya dawa za kulevya aina ya bangi ikiwa na uzito wa kilo 430 kando ya Barabara Kuu ya Morogoro- Iringa katika Kata ya Mangae , Wilaya ya Mvomero.

Kamanda wa Polisi wa mkoa huo, Alex Mkama amesema hayo Desemba 31, 2023, na kusema Polisi walikuwa wanafuatilia nyendo za gari hilo baada ya kupata taarifa kutoka kwa raia wema kuhusu usafirishaji  dawa za kulevya aina ya bangi  kwenda Dar es Salaam.

“Tuliweka mtego eneo la Kijiji cha Soli, Kata ya Mangae. Katika mtego huo tumefanikiwa kukamata dawa za kulevya aina ya bangi mifuko 30 yenye kilo 430 na pikipiki sita ambazo zilikuwa zinatumika kusafirisha kutoka mbali inakolimwa  na kuletwa maeneo  haya ya barabarani …lakini kwa bahati mbaya waliweza kukimbia kabla ya kukamatwa  kwao, “ amesema Mkama.

Mkama, amesema  wameamua kushikilia Pikipiki hizo sita ili kuwapata wamiliki wake ka lengo la kuwapata  madereva wake pamoja na mmiliki wa  Lori hilo ili kufanya naye mahojiano kuhusu hizo dawa zilizizokamatwa.

Kamanda Mkama amesema kuwa Lori hilo ndani yake lilibeba chakula cha kuku  mifuko 359 kikisafirishwa kutoka mkoani Iringa kwenda jijini Dar es Salaam.

“Njia aliyoitumia kati kati ya mifuko  ya chakula cha kuku ameiweka  mifuko ya bhangi  na kwenye ukaguzi wa kawaida si rahisi kwa Polisi kuweza kubaini au kung’amua lazima uwe na taarifa sahihi.” Amesema Mkama.