UJENZI WA DARAJA LENYE KIVUKO CHA CHINI (UNDERPASS) MBOZI LAKAMILIKA ASILIMIA 65

Ujenzi wa daraja la kivuko cha chini linalojengwa katika Kijiji cha lumbila almaarufu njia panda ya Iyula katika barabara ya Ruanda -Isongole Wilayani Mbozi Mkoani Songwe ambalo litakuwa na fursa mbalimbali za kibiashara ndani yake limefikia zaidi ya asilimia 65% huku likiwatarajia kuufungua mji wa Ruanda kutokana na aina ya ujenzi wa daraja hilo ,huku likienda kupunguza ajali kutokana na kuwa magari yatakuwa yanapita juu na watumiaji wa miguu wakipita chini.

Hayo yamebainishwa na Meneja wa Wakala wa Barabara Tanzania (TANROADS) Mkoa wa Songwe Mhandisi Suleiman Bishanga huku akisema kuwa mradi huo ni moja kati ya miradi inayotekelezwa Mkoani Songwe ambao utaenda kubadilisha Mji wa Ruanda na kufungua fursa mbalimbali kWa wakazi na watumiaji wa barabara hiyo.

Wakizungumza kwa nyakati tofauti baadhi ya wakazi na watumiaji wa barabara ya Ruanda Isongole kupitia iyula ambako mradi huo unajengwa wameishukuru Serikali chini ya Rais Dkt Samia Suluhu Hassan kwa ujenzi wa daraja hilo huku wakiomba likamilike kwa wakati ili fursa wazipate ikiwemo ya urahisi wa usafirishaji wa mazao yao kupitia barabara hiyo.