MPANGO AAGIZA WATUMISHI WABADHILIFU WAAONDOLEWE SERIKALINI

Makamu wa Rais Dk, Philip Mpango akihutubia wakati wa ufunguzi wa Mkutano Mkuu wa 37 wa Jumuiya ya Tawala za Mitaa Tanzania (ALAT) unaofanyika leo Mei 29, 2023 katika Kituo cha Kimataifa cha Mikutano cha Arusha (AICC).

Dk Mpango amesema kuwa watumishi wabadhirifu wa fedha za halmashauri waondolewe kwani wamekuwa wakiichonganisha Serikali na wananchi wake, huku akisisitiza kuondolewa kwa haki bila kuonewa.

Arusha. Makamu wa Rais, Dk Philip Mpango amewaagiza viongozi wa watumishi na Tamisemi kuwaondoa wafanyakazi wao watakaobainika kufanya matumizi mabaya ya fedha za Umma.

 Dk Mpango ametoa maagizo hayo leo Jumatatu Mei 29, 2023 wakati akifungua mkutano mkuu wa 37 wa Jumuiya ya Tawala za Serikali za Mitaa (ALAT), unaofanyika katika ukumbi wa mikutano wa AICC jijini Arusha.

Alisema kuwa watumishi wabadhirifu wamekuwa wakiichonganisha Serikali na wananchi wake wanaolipa kodi hivyo waondolewe kuepuka migogoro.

Dkt Mpango amezionya halmashauri zinazokutwa na dosari ya matumizi mabaya ya fedha za umma kupitia ukusanyaji mapato, matumizi, manunuzi na usimamiaji wa miradi ya maendeleo.

"Halmashauri mliopata hati chafu na zile zinazokutwa na dosari katika ubadhirifu wa fedha za makusanyo na zile za miradi ya maendeleo mnayoletewa, anzeni kujitathimini wenyewe namna mnapaswa kuenenda katika utumishi wenu na kuhudumia wananchi," amesema.

Zaidi aliwataka wajumbe wote wa ALAT kujibu hoja zote za mkaguzi mkuu wa hesabu za serikali kikamilifu lakini kuongeza ubunifu na nguvu katika ukisanyaji mapato na kudhibiti ufujaji wake ili kuisaidia serikali kuu kufikia malengo yake yaliyojiwekea ya utekelezaji wa miradi ya maendeleo.

"Bado ziko halmashauri hazichangii shughuli za maendeleo kulingana na asilimia iliyotakiwa, lakini pia ziko zilizobainika kutumia fedha nyingi kutekeleza shughuli ambazo hazikuidhinishwa niwaonye pia halmashauri inazofanya malipo makubwa kwenye manunuzi tena zingine hata hazijaidhinishwa na bodi ya zabuni," alisema Dk Mpango.

Alisema kuwa Serikali itaendelea kutoa fedha za kutosha katika utekelezaji wa maendeleo na kuwataka viongozi wa halmashauri na madiwani kusimamia vema fedha hizo zifanye kazi kusudiwa kwa ajili ya ukuaji wa miji, vijiji na majiji.

Awali Kaimu mwenyekiti wa ALAT, Sima Costantine ameshukuru serikali kutenga fedha za miradi katika serikali za mitaa  wataendelea kusimamia utekelezaji wa miradi ya maendeleo.

Costantine alitumia nafasi hiyo kuiomba serikali kufanyia kazi mashauri ya muda mrefu ya wakurugenzi waliosimamishwa kazi kwa sababu mbalimbali ili hatma zao zijulikane mapema lakini pia kuajiri watumishi wa kada za uhasibu na ugavi wenye uzoefu ilii kuleta ufanisi katika utendaji wa serikali za mitaa.

"Tunaomba serikali itazame upya maslahi ya madiwani na viongozi wote wa serikali za mitaa lakini pia ofisi ya Rais, Tamisemi waendelee kutoa semina elekezi kwa viongozi wa ngazi mbalimbali kwa Serikali Kuu na serikali za mitaa ili kutambua mipaka yao ya kazi wakati wa utekelezaji wa majukumu yao ili kuepuka kutokea mgongano wa kimaslahi au wa nafasi zao.

Awali Mkuu wa Mkoa wa Arusha akizungumza katika mkutano hua alisema kuwa wana imani kubwa na wajumbe wa ALAT hasa madiwani katika majukumu ya usimamiaji na utekelezaji wa mapato, matumizi na miradi lakini kuwataka kuhoji kila matumizi wanayoletewa